
دورت في المكتب لحد ما لقيت المفتاح مربوط في سلسلة قديمة.
فتحته.
كان جواه ظرف بني، وصورة قديمة لوالدي واقف جنب راجل ماعرفوش، ودفتر صغير مكتوب على غلافه اسمي.
إيدي اترعشت وأنا بفتح الدفتر.
أول صفحة كان مكتوب فيها:
«لبنتي مريم… لو وصلتي لليوم اللي تقري فيه الكلام ده، يبقى أنا ماقدرتش أحميكي من الحاجة اللي كنت خايف منها».
حسيت بدموعي بتنزل.
كملت قراءة.
«يا بنتي، كريم الشافعي مش الشخص اللي إنتِ فاكرة إنك عرفتيه. أنا قابلته قبل جوازكم، وعرفت إنه كان بيحاول يوصل لأوراق تخص عيلتنا وممتلكاتنا. حاولت أفهمه إن مفيش حاجة من حقه، لكنه أصر إنه يتجوزك».
وقفت عن القراءة.
بصيت لسارة وقلت:
«يعني بابا كان عارف؟»
سارة قربت مني وقالت:
«كملي يا مريم».
رجعت للدفتر.
«أنا رفضت الجوازة، لكن لما لقيتك بتحبيه، قررت ما أضغطش عليكي. كنت ناوي أواجهه بالحقيقة، لكن حصلت مشكلة كبيرة في الشركة اللي كان شغال فيها قبل ما يعمل شركته الخاصة».
قلبت الصفحة، ولقيت ورقة متدبسة في الدفتر.
كانت صورة لتحويل بنكي بمبلغ كبير، والتاريخ كان قبل جوازي بشهرين.
اسم المرسل: كريم الشافعي.
واسم المستلم: فاطمة حسن، أمي.
حسيت إن نفسي اتسحب مني.
سارة قالت:#حكايات_الكاتبه_شروق_خالد
«دي الفلوس اللي ناتالي كانت بتتكلم عنها؟»
هزيت راسي.
لكن لسه فيه حاجة أهم.
في آخر الدفتر، لقيت ورقة مكتوب عليها بخط أبويا:
«لو مريم سألت عن مبلغ التحويل، لازم تعرف إن فاطمة ماخدتش الفلوس لنفسها. هي كانت بتحاول تنقذ بنتها من مصيبة أكبر».
رفعت عيني من الورقة.
«تنقذني من إيه؟»
فتحت الظرف البني بسرعة.
لقيت جواه جواب قديم بخط أمي.
كان مكتوب فيه:
«أنا وافقت آخد الفلوس من كريم عشان طلب مني أساعده يبعد عن مريم. قاللي إنه داخل في مشكلة كبيرة، وإنه لو اتجوز بنتي هتتأذى بسببه. لكن بعد ما أخدت الفلوس، رجع تاني وهددني إنه لو ما وافقتش على الجوازة، هيخلي مريم تعرف إني أخدت رشوة منه».
حطيت إيدي على بقي.
يعني أمي كانت عارفة إن كريم خطر، لكنها كانت بتحاول تبعده عني؟
كملت قراءة الجواب.
«حاولت أقول لأبوكي، لكنه طلب مني أسكت لحد ما يلاقي دليل يقدر يواجهه بيه. وبعدها بأيام حصلت له الوفاة، وخفت أقولك الحقيقة وأخسرك إنتِ كمان».
في اللحظة دي موبايل سارة رن.
بصت للشاشة، وملامحها اتغيرت.
«مريم… ده رقم كريم».
قلت لها:
«ردي».
حطت الموبايل على السماعة الخارجية.
صوت كريم طلع غاضب:
«مريم، إنتِ فين؟»
رديت:
«في مكان إنت عمرك ما كنت تستاهل تدخله».
قال بعصبية:
«إنتِ بتلعبي بالنار. أنا عايزك ترجعي البيت فورًا».
«ليه؟»
«عشان فيه ناس جاية، ولازم نتكلم قبل ما الموضوع يكبر».
ضحكت بسخرية.
«الموضوع كبر من زمان يا كريم».
سكت لحظة، وبعدين قال:
«إنتِ فتحتي أوراق أبوكي؟»
اتجمدت مكاني.
إزاي عرف إني في شقة بابا؟!
قلتله:
«إنت بتراقبني؟»
رد بسرعة:#حكايات_الكاتبه_شروق_خالد
«أنا عارف كل حاجة يا مريم. وبقولك للمرة الأخيرة، ابعدي عن الأوراق دي».
سألته:
«إنت خايف من إيه؟»
قال بصوت منخفض:
«أنا مش خايف على نفسي… أنا خايف عليكي وعلى بنتي».
قلتله:
«بنتي ملهاش دعوة بيك».
رد بعصبية:
«بنتي أنا كمان!»
قفلت المكالمة.
سارة بصتلي بخوف وقالت:
«مريم، إحنا لازم نمشي من هنا».
لميت الأوراق وحطيتها في الشنطة، وقبل ما نخرج، عيني وقعت على الصورة القديمة اللي كانت في الدرج.
الصورة اللي فيها أبويا واقف جنب الراجل الغريب.
قلبت الصورة، ولقيت مكتوب على ظهرها اسم وتاريخ.
الراجل اللي واقف جنب أبويا كان اسمه فؤاد الشافعي.
والتاريخ كان قبل جوازي من كريم بأربع سنين.
قربت الصورة من عيني.
فؤاد الشافعي…
ده كان والد كريم!
يعني أبويا كان يعرف والد كريم من زمان.
وفجأة افتكرت إن كريم كان دايمًا بيقول إن والده مات وهو صغير، وإنه عمره ما عرف عنه أي حاجة.
لكن الصورة أثبتت إن أبويا كان على علاقة بيه.
وقبل ما أقدر أفكر أكتر، وصلني إشعار برسالة جديدة من رقم مجهول.
فتحتها، وكان مكتوب فيها:
«لو عايزة تعرفي مين قتل والدك، اسألي جوزك عن اللي حصل في آخر اجتماع جمعه بفؤاد الشافعي».
إيدي بدأت ترتعش.
أبويا مات من تسع سنين، وقالوا وقتها إنها أزمة قلبية مفاجئة.
لكن الرسالة دي كانت بتقول إن موته ممكن ماكانش طبيعي.
رفعت عيني لسارة وقلت بصوت مخنوق:
«أنا لازم أعرف الحقيقة… حتى لو الحقيقة دي هتدمر كل حاجة».
وفي نفس اللحظة، رن تليفوني تاني.
المرة دي كان رقم أمي.
أول ما رديت، سمعتها بتعيط وبتقول:
«مريم، لازم تيجيلي حالًا… كريم كان عندي من شوية، وقاللي إنه عرف إنك لقيتي جواب أبوكي».
سألتها بلهفة:
«عملك حاجة يا ماما؟»
قالت وسط عياطها:
«لأ يا بنتي، بس سابلي حاجة قدام الباب… حاجة تخص أبوكي، وأنا خايفة أفتحها لوحدي».
يتبع…
حسيت إن قلبي هيخرج من مكانه، وقلت لأمي بسرعة:
«ماما، إنتِ في البيت لوحدك؟»
ردت وهي بتعيط:
«أيوه يا بنتي، ومش عارفة أعمل إيه. كريم جه وخبط عليا، ولما فتحت الباب دخل من غير ما يستأذن، وفضل يسألني إنتِ فين، ولما قلتله معرفش، سابلي ظرف ومشي».
«طب فتحتي الظرف؟»
«لأ، خفت. مكتوب عليه اسم أبوكي».
بصيت لسارة وقلت:
«لازم نروح لماما».
سارة اعترضت:#حكايات_الكاتبه_شروق_خالد
«مريم، إنتِ في الشهر السابع، ومش هينفع تفضلي تحت الضغط ده. خلينا نكلم المحامي الأول».
لكن أنا كنت محتاجة أشوف أمي وأطمن عليها.
اتصلت بالمستشار أحمد وحكيتله اللي حصل، وطلب مني ما أفتحش الظرف لوحدي، ووعد إنه هيلحقنا عند أمي.
بعد حوالي نص ساعة وصلنا بيتها.
أول ما شافتني حضنتني بقوة وفضلت تعيط.
«سامحيني يا بنتي… سامحيني إني خبيت عليكي».
مسكت وشها بين إيديا وقلت:
«إنتِ أمي، وأنا عايزة أعرف الحقيقة، مش عايزة ألومك».
دخلنا الصالون، وكان الظرف موجود فوق الترابيزة.
ظرف قديم لونه أصفر، ومكتوب عليه بخط أبويا:
«إلى مريم… لا يُفتح إلا عند الضرورة».
المحامي وصل بعد دقائق، وبعد ما راجع الظرف وتأكد إنه مش محتاج أي إجراء خاص، فتحناه بحذر.
كان جواه ثلاث حاجات.
الأولى صورة قديمة لأبويا مع فؤاد الشافعي.
والتانية فلاشة صغيرة.
والتالتة جواب طويل.
مسكت الجواب وبدأت أقرأ.
«بنتي مريم،
منذ 4 أيام
0 290 11 دقائق

