
فضلت باصة للورقة اللي المحامي حطها قدام كريم، ومخي مش قادر يستوعب اللي بيحصل.
توقيع شخص من عيلتي؟
مين ممكن يعمل فيا كده؟
أبويا متوفي من سنين، وأمي ست بسيطة عمرها ما اتدخلت في فلوسي ولا شغلي، وأخويا محمود عمره ما كان بينه وبين كريم أي مشاكل.
بصيت للمحامي وسألته بصوت مهزوز:
«هو مين اللي مضي على الورق ده؟»
المحامي بصلي وقال:
«مدام مريم، التوقيع الموجود هنا يخص والدتك، الأستاذة فاطمة».
حسيت إن قلبي وقف.
«أمي؟! مستحيل… أمي ملهاش أي علاقة بالشركات دي!»
كريم حاول يتدخل بسرعة:
«مريم، استني، الموضوع مش زي ما إنتِ فاهمة».
بصيتله بغضب:
«إنت مالك؟ إنت عارف حاجة عن الموضوع ده؟»
المحامي رد بدلًا منه:
«فيه توكيل رسمي صادر من والدتك من حوالي سبع شهور، بيسمح بإدارة بعض الممتلكات والحسابات المرتبطة بيكي».
هزيت راسي وأنا مش مصدقة.
«أمي عمرها ما قالتلي إنها عملت توكيل لأي حد».
المحامي كمل:
«والأغرب إن التوكيل ده اتستخدم في معاملات مالية بمبالغ كبيرة، وفيه تحويلات تمت لحساب شركة مرتبطة بالأستاذة ناتالي».
بصيت لكريم.
كان واقف ساكت، وعينيه بتتحرك بيني وبين المحامي.
قلتله:#حكايات_الكاتبه_شروق_خالد
«إنت دخلت أمي في الموضوع ده إزاي؟»
رد بعصبية:
«أنا ما دخلتش حد في حاجة. والدتك كانت عارفة إن فيه إجراءات مالية».
صرخت فيه:
«إنت بتكدب! أمي لو عرفت إنك بتستخدم اسمي بالطريقة دي كانت أول واحدة هتقف في وشك».
سارة قربت مني ومسكت إيدي.
«مريم، اهدي عشان البيبي».
لكن أنا كنت حاسة إن كل حاجة حواليا بتنهار.
المحامي طلب مني أقعد، وبدأ يشرحلي إننا لازم نتأكد من صحة التوكيل، ونطلب مراجعة التوقيعات والمعاملات، وإنه مش من حق كريم يتصرف في أي أصول تخصني من غير سند قانوني صحيح.
وفجأة موبايل كريم رن.
بص للشاشة، وقفل المكالمة.
بعد ثواني رن تاني.
المرة دي رد.
«أيوه يا أمي».
سكت شوية، وبعدين قال:
«لأ، مش وقته دلوقتي».
قفل، ووشه اتغير.
سألته:
«مين؟»
قال:
«أمي».
ابتسمت بمرارة.
«واضح إن العيلة كلها عارفة حاجة وأنا آخر واحدة تعرف».
ما ردش.
بعد حوالي عشر دقايق، المحامي طلب منه يسيبنا نتكلم، لكن كريم رفض يتحرك.
قال:
«أنا مش خارج من بيتي».
رد المحامي بهدوء:
«إحنا مش بنطلب منك تسيب البيت، لكن الأفضل إن أي كلام مالي أو قانوني يحصل من خلالنا».
كريم بصلي وقال:
«مريم، إنتِ بجد هتعملي كل ده بعد تسع سنين جواز؟»
قلتله:
«إنت اللي عملت كل ده بعد تسع سنين جواز».
فضل باصصلي، وبعدين أخد مفاتيحه وخرج من البيت.
أول ما الباب اتقفل، انهرت في العياط.
سارة حضنتني وقالت:
«عيطي يا حبيبتي، طلعي كل اللي جواكي، بس إوعي تضعفي قدامه».
المحامي استأذن وخرج بعد ما اتفق معايا على ميعاد تاني، وفضلت أنا وسارة لوحدنا.
بعد شوية، قررت أتصل بأمي.
رن التليفون مرتين، وبعدها ردت.
«أيوه يا مريم، حبيبتي، عاملة إيه؟»
أول ما سمعت صوتها، دموعي نزلت.
«ماما، أنا عايزة أسألك سؤال، وعايزاكي تجاوبيني بصراحة».
صوتها اتغير.#حكايات_الكاتبه_شروق_خالد
«في إيه يا بنتي؟ مالك؟»
«إنتِ عملتي توكيل لكريم؟»
سكتت.
فضلت مستنية ردها، لكن سكوتها كان مخيف.
قلت تاني:
«ماما، ردي عليّا».
قالت بصوت واطي:
«يا بنتي، كريم قالي إن ده إجراء عادي عشان يأمن مستقبلك ومستقبل البيبي».
حطيت إيدي على وشي.
«إنتِ إمتى مضيتي؟»
«من حوالي سبع شهور».
«وإنتِ قريتي الورق؟»
«لأ، هو قال إن المحامي بتاعه مجهز كل حاجة، وإنه محتاج توقيعي بس عشان يخلص إجراءات تخصك».
سألتها وأنا بحاول أسيطر على نفسي:
«ومين كان موجود معاكي؟»
قالت:
«كريم، وناتالي».
اتجمدت مكاني.
«ناتالي كانت عندك؟»
«أيوه، قال إنها موظفة في الشركة، وكانت بتساعده في الورق».
قفلت عيني وأنا بحاول أفهم إزاي كريم قدر يدخل الست دي في حياة عيلتي بالشكل ده.
لكن أمي قالت جملة خلتني أسكت تمامًا:
«بس يا مريم، فيه حاجة أنا ماقولتهالكش».
«إيه يا ماما؟»
«كريم جه عندي من حوالي شهر، وكان عايزني أمضي على ورق تاني».
«وإنتِ مضيتي؟»
«لأ. المرة دي رفضت، ولما سألته عن الورق اتعصب ومشي».
حسيت إن فيه أمل صغير ظهر وسط كل الخراب ده.
سألتها:
«الورق ده كان إيه؟»
قالت:
«كان تنازل عن نصيبك في شقة أبوكي القديمة».
وقفت فجأة من مكاني.
شقة أبويا!
الشقة اللي في مصر الجديدة، واللي سايبها ليا قبل ما يموت، واللي كانت أغلى حاجة عندي من ريحته وذكرياته.
قلت بصوت مخنوق:
«ماما، هو كان عايز ياخد شقة بابا كمان؟»
ردت:
«أنا ماوافقتش يا بنتي. دي شقة أبوكي، وهو سايبها ليكي».
في اللحظة دي فهمت إن كريم ماكانش بس بيخوني.
كان بيحاول يستولي على كل حاجة أملكها، حتى الحاجة الوحيدة اللي ورثتها عن أبويا.
بعد ما قفلت مع أمي، سارة بصتلي وقالت:
«لازم نعرف هو عمل إيه بالظبط، ومين ساعده».
هزيت راسي وقلت:#حكايات_الكاتبه_شروق_خالد
«أنا مش هسيب حقي».
لكن قبل ما نكمل كلامنا، وصلني إشعار جديد على الموبايل.
رسالة من ناتالي.
فتحتها، ولقيت مكتوب:
«مبروك يا مريم، أتمنى تكوني فرحانة إنك عرفتي الحقيقة. بس قبل ما تحكمي على كريم، اسألي نفسك هو ليه اختارك إنتِ من بين كل الستات؟»
فضلت باصة للرسالة.
وبعدها وصلت رسالة تانية:
«واسألي والدتك كمان عن الفلوس اللي استلمتها من كريم قبل جوازكم».
حسيت بصدمة جديدة.
فلوس قبل جوازنا؟
بصيت لسارة وقلت:
«أنا لازم أعرف ناتالي تقصد إيه».
لكن سارة خدت الموبايل من إيدي وقالت:
«استني يا مريم. مترديش عليها. ممكن تكون بتحاول توقعك في فخ».
وفي اللحظة دي، افتكرت حاجة قديمة جدًا.
قبل جوازي من كريم بشهور، أبويا كان رافض الجوازة تمامًا، وكان بيقول إن فيه حاجة مش مريحاه في الراجل ده.
وأنا وقتها زعلت منه، واعتبرت إنه مش عايزني أتجوز وأبعد عنه.
لكن قبل وفاته بأسبوع، ندهلي وقال:
«يا مريم، لو في يوم لقيتي نفسك مضطرة تختاري بين قلبك وعقلك، اختاري عقلك. مش كل اللي بيحبونا بيكونوا عايزين لينا الخير».
وقتها ما فهمتش قصده.
لكن دلوقتي بدأت أشك إن أبويا كان عارف حاجة عن كريم من البداية.
يتبع…
فضلت طول الليل مش عارفة أنام. كلام ناتالي كان بيلف في دماغي، خصوصًا جملتها عن الفلوس اللي أمي استلمتها من كريم قبل جوازنا.
إيه الفلوس دي؟ وليه كريم يدفع لأمي؟ وإيه علاقة ده برفض أبويا للجوازة من البداية؟
تاني يوم الصبح، صحيت على صوت سارة وهي بتكلمني.
«مريم، إنتِ صاحية؟»
فتحت عيني بالعافية وقلت:
«أيوه، في إيه؟»
«المحامي أحمد على التليفون، وعايز يكلمك ضروري».
أخدت الموبايل منها.
«صباح الخير يا أستاذ أحمد».
قال بصوت جاد:
«صباح النور يا مدام مريم. أنا راجعت شوية مستندات جديدة، وفيه تطور مهم جدًا».
«خير؟»
«الشركة اللي باسمك وباسم كريم وناتالي اتعملت قبل جوازكم بشهرين، مش من سبع شهور زي ما كنا فاكرين».
اتعدلت في قعدتي.
«إزاي؟ أنا اتجوزت كريم من تسع سنين!»
قال:
«بالظبط. وده معناه إن فيه معاملات مالية قديمة جدًا، وفيه مستندات بتشير إن اسمك اتستخدم في تأسيس الشركة من غير علمك».
سألته:#حكايات_الكاتبه_شروق_خالد
«طب إيه علاقة أمي بالموضوع؟»
رد:
«أنا محتاج أشوف والدتك شخصيًا، وأراجع التوكيل اللي مضته، وكمان محتاج أعرف إذا كان فيه أي مستندات تخص والدك الله يرحمه».
أول ما سمعت اسم أبويا، افتكرت كلامه قبل وفاته.
قلت:
«أنا عندي إحساس إن بابا كان عارف حاجة».
المحامي قال:
«ممكن يكون عنده مستندات أو مراسلات قديمة. حاولي تدوري في أوراقه، لكن من غير ما تتصرفي في أي مستند قبل ما نراجعه».
قفلت المكالمة، وبصيت لسارة.
«أنا رايحة شقة بابا».
سارة قالت:
«هروح معاكي».
بعد ساعة كنا في شقة أبويا القديمة في مصر الجديدة.
أول ما فتحت الباب، ريحة المكان رجعتلي ذكريات كتير. نفس المكتبة، نفس الكرسي اللي كان بيقعد عليه، ونفس صورته اللي كانت معلقة جنب الشباك.
دخلت أوضته وبدأت أفتح الأدراج.
كنت بدور على أي ورقة ممكن توضحلي الحقيقة.
سارة كانت بتساعدني، لحد ما لقيت درج صغير مقفول بمفتاح.
افتكرت إن بابا كان بيخبي فيه أوراقه المهمة.
تابع المقال
منذ 4 أيام
0 289 11 دقائق


