روايات وقصص

سرّ الـ 8 شهور ج4 حكايات شروق خالد

فضلت واقف مكاني، قلبي بيدق في صدري كإنه عايز يخرج، وصوتي مش طالع من الصدمة.— إنتي بتقولي إيه يا يارا؟ إنتي متأكدة من الكلام ده؟مسحت دموعها بطرف كمها، وبصتلي بنظرة كلها خوف وشفقة في نفس الوقت.

— أنا شفت بعيني يا عم محمود. من قبل ما أمشي، كنت بصحى بالليل ألاقيه في المطبخ، بيفتح إزازة صغيرة مفيش عليها أي ليبل، وبيحط منها نقط في الفنجان بتاعك اللي بيجهزه من بالليل أو الصبح بدري.

الدنيا لفت بيا، ومسكت في الحيط عشان موقعش.— نقط إيه؟ وليه؟— معرفش نقط إيه، بس لما سألته مرة بالصدفة إيه اللي في إيده، اتجنن وزعق فيا، وقالي إن دي مقويات ليك عشان سنك، وإن ده مش شغلي.

بس بعديها بأيام، شفت ورق مطبوع على مكتبه عن ورثة الشركة، وعن إزاي يقدر يمسك هو الإدارة كاملة في أسرع وقت. حسيت إن مية متلجة اتدقت على دماغي. كريم؟ ابني اللي ربيته وكبرته وتعبت عليه السنين دي كلها، ناوي يخلص مني عشان الفلوس والسلطة؟

— طب ليه مقولتليش وقتها؟ ليه سكتي؟— حاولت ألمحلك، بس كريم كان عامل عليا رقابة مشددة. ولما حس إني بدأت أشك وأفهم، لفقلي تهمة السرقة، وطردني في نص الليل، وهددني إنه لو لمحتلك بحاجة، هيحط اسمي في قضايا وهيبعتلي ناس يخلصوا عليا.— والفلوس اللي قال إنك سرقتيها؟— كدب في كدب.

هو اللي كان بيحول مبالغ لحسابات تانية باسم شركات وهمية، ولما المراجع بدأ يسأل، رمى البلا كلها عليا عشان يطلع هو البريء اللي اتغدر بيه قدامك. رجعت خطوة لورا، وعقلي رافض يصدق، بس جسمي اللي بيترعش وطعم الحديد اللي في بقي من شهور كانوا أكبر دليل إن كلامها صح.

— طب وإنتي عايشة إزاي بقالك تمن شهور؟ ومين اللي بياخد باله منك؟— ربنا هو اللي ساترها معايا يا عم محمود. اشتغلت في كذا مكان لحد ما ربنا رزقني بالشغل هنا، وصاحب المطعم راجل طيب ومقدر ظروفي، بس مرتبي يا دوب بيكفي أكل وشرب ودوا.

بصيت لبطنها المنتفخة، وحسيت بوجع في قلبي عمره ما حصل قبل كده. حفيدي جاي على الدنيا وأبوه ناوي يغدر بجده، ومراته مشردة في الشوارع. في اللحظة دي، باب الممر اتفتح فجأة، وطلع طارق علام.— محمود، إنت كويس؟ اتأخرت جوه، وشك بقى أصفر خالص.

 

بصيت لطارق، وبعدين بصيت ليارا، وخدت قراري في ثانية.— طارق، خد يارا وطلعها على العربية، ومش عايز أي حد يعرف إنها هنا. طارق استغرب، بس شاف نظرة عيني فمسك دراع يارا براحة وسندها.— حاضر يا محمود، يلا يا بنتي. يارا بصتلي بخوف.— عم محمود… لو كريم عرف إنك عرفت، هيتجنن.

بصتلها بثبات، وأول مرة من شهور أحس إن في قوة بترجعلي.— كريم مش هيعرف حاجة… لحد ما أنا أكون جاهز أواجهه. والنهاردة، مش هيتشرب فنجان قهوة واحد في البيت ده من إيده.

طلعت موبايلي، واتصلت بأقدم وأصدق دكتور تحاليل أعرفه، وقلتله يجهز نفسه فوراً، لأن الليلة دي هتقلب موازين عيلتي كلها للأبد. سرّ الـ 8 شهور#حكايات_الكاتبه_شروق_خالد

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى