
مريم حست إن الأرض بتلف بيها.
الرجل كمل وهو بيحاول يلتقط أنفاسه:
“وإنتِ بقى، على ما أعتقد، مريم… البنت اللي عيلتي دفعت فيها خمسين مليون جنيه علشان تتجوزني!”
سيخ الحديد وقع من إيدها وخبط في الأرض.
فضلت باصة له وعينيها متسعة من الصدمة.
وبصوت مش قادر يطلع من حلقها، همست:
“إنت… إنت ياسين الجبالي؟”
ابتسم ابتسامة جانبية ساخرة، وقال:
“للأسف… لسه عايش زي ما إنتِ شايفة.”
وبعدين بص للكوباية اللي على الترابيزة، ورجع بعينيه ليها.
“بس واضح إنك كنتِ مستعجلة على موتي أوي… لدرجة إنك بدأتي تحتفلي من دلوقتي!”
مريم حسّت بوشها بيحمر، واتلخبطت في الكلام.
“أنا… أنا مكنتش…”
قاطعها وهو بيعدل قعدته بصعوبة:
“متتعبيش نفسك يا مريم… أنا سمعت كلام كتير عن الجوازة دي، وعارف كويس إنتِ هنا ليه.”
سكت لحظة، وبعدين قال بنبرة باردة:
“بس فيه حاجة واحدة محدش قالهالك.”
بلع ريقه، وحط إيده على صدره من شدة الألم.
“أنا مش هموت بالسرعة اللي إنتِ متخيلاها.”
مريم فضلت واقفة مكانها، مش عارفة تفرح ولا تخاف.
لأنها في اللحظة دي فهمت إن حياتها اللي كانت فاكرة إنها هتبدأ بعد موت جوزها…
ممكن تكون لسه ما بدأتش أصلًا.
مريم فضلت واقفة مكانها، عينيها متعلقة بياسين، وعقلها مش قادر يستوعب اللي بيحصل.
الراجل اللي كل يوم كانت بتسمع إنه بيموت، واللي الخدم كانوا بيحلفوا إنه مش قادر حتى يرفع إيده، قاعد قدامها وبيتكلم معاها!
ياسين مد إيده ناحية الكوباية اللي على الترابيزة، لكن إيده كانت بتترعش، فوقع منها شوية على هدومه.
اتنهد بضيق وقال:
“هو مفيش حد في البيت ده يعرف يعمل كوباية شاي عدلة؟”
مريم بصت له باستغراب.
“إنت عايز تشرب شاي؟”
رفع عينه ليها.
“لأ، عايز أزرع شجرة شاي في الصالون! أيوه عايز أشرب شاي يا مدام.”
مريم اتضايقت من طريقته.
“طب ما تطلب من الخدم.”
ضحك ضحكة قصيرة اتحولت لكحة قوية، لدرجة إنه حط إيده على صدره وفضل يحاول ياخد نفسه.
مريم اتحركت ناحيته من غير تفكير.
“إنت كويس؟ أجيبلك الدكتور؟”
رفع إيده يمنعها.
“متعمليش فيها مراتي الحنينة، مش محتاج تمثيل.”
الكلام وجعها، لكنها حاولت متبينش.
“أنا مش بمثل، إنت شكلك تعبان فعلًا.”
بصلها شوية، وبعدها قال:
“غريبة… أول مرة حد يقول عليا تعبان من غير ما يكون مستني يسمع خبر وفاتي.”
مريم سكتت.
ياسين رجع راسه للكرسي وغمض عينيه.
“روحي نامي.”
“وأنت؟”
فتح عين واحدة وبصلها.
“أنا هنام هنا.”
“بس دي أوضتي!”
رفع حاجبه وقال بسخرية:
“أوضتك؟ هو أنا بقيت ضيف في بيتي وأنا مش واخد بالي؟”
مريم حطت إيديها في وسطها وقالت بعصبية:
“إنت عندك قصر كامل، وفيه أوض كتير، إيه اللي جابك أوضتي أنا بالذات؟”
ياسين بص لها بنظرة طويلة، وبعدين قال:
“علشان أوضتي مقفولة من شهور، ومش قادر أوصل لها.”
مريم اتكسفت من نفسها شوية، لكنها مردتش.
وفجأة الباب اتفتح بسرعة، ودخلت ست كبيرة في السن، أول ما شافت ياسين شهقت وحطت إيدها على قلبها.
“يا نهار أبيض! يا بني إنت إيه اللي طلعك من أوضتك؟!”
ياسين بص لها بضيق.
“مساء الخير يا حاجة زينب.”
الحاجة زينب قربت منه بسرعة.
“مساء الخير إيه بس يا حبيبي؟ إنت لسه خارج من المستشفى من كام يوم، والدكتور قالك ممنوع تتحرك لوحدك!”
مريم بصت من الحاجة زينب لياسين.
“مستشفى؟”
الحاجة زينب التفتت لها.
“أيوه يا بنتي، البيه كان في المستشفى فترة طويلة، وربنا وحده اللي عالم بحالته.”
ياسين قاطعها:
“خلاص يا زينب، مش عايز أسمع سيرة المستشفى.”
الحاجة زينب بصت له بحنان.
“طب أجيبلك دواك؟”
“بعد شوية.”
“بس الدكتور قال…”
“قولت بعد شوية!”
صوته كان حاد، والحاجة زينب سكتت فورًا.
مريم لاحظت إن الست دي خايفة عليه أكتر ما هي خايفة منه.
قربت من ياسين وقالت:
“طب على الأقل لازم ترتاح.”
بصلها باستغراب.
“إنتِ بتديني أوامر؟”
“لأ، بنصحك.”
“احتفظي بنصايحك لنفسك.”
الحاجة زينب حاولت تخفف التوتر.
“تعالي يا مريم يا بنتي، ساعديني نرجع البيه لأوضته.”
مريم بصت لياسين.
“تقدر تمشي؟”
رد ببرود:
“كنت ماشي قبل ما أشوفك.”
الحاجة زينب كتمت ضحكتها بالعافية.
لكن مريم ما ضحكتش.
مدت إيدها تساعده، لكنه بص لإيدها وكأنه اتضايق من مجرد الفكرة.
“مش محتاج مساعدة.”
حاول يقوم لوحده، لكنه أول ما وقف جسمه مال فجأة، والعصاية وقعت من إيده.
مريم لحقت تسنده قبل ما يقع.
إيده مسكت في كتفها، ووشه بقى قريب جدًا من وشها.
للحظة، عينيه اتقابلت بعينيها.
كان فيه وجع واضح في عينيه، وجع أكبر بكتير من اللي بيحاول يخبيه.
همس بغضب:
“سيبيني.”
مريم ردت بهدوء:
“لو سبتك هتقع.”
“مش شغلتك.”
“بس أنا مش هسيبك تقع قدامي.”
فضل باصص لها ثواني، وكأنه لأول مرة يسمع كلام مش وراه مصلحة.
وبعدين سمح لها تسنده.
خرجوا من الأوضة ببطء، والحاجة زينب ماشية وراهم وهي بتدعي.
لكن مريم ما كانتش تعرف إن الليلة دي هتكون بداية سلسلة أسرار، وإن الراجل اللي اتجوزته علشان يموت قريب، كان مخبي حقيقة أخطر بكتير من مرضه.
وأول ما وصلوا لأوضته، ياسين طلب من الحاجة زينب تسيبهم لوحدهم.
الحاجة زينب بصت لمريم بقلق.
“خلي بالك منه يا بنتي.”
مريم هزت راسها.
أول ما الباب اتقفل، ياسين اتكلم من غير ما يبصلها:
“اقفلي الباب بالمفتاح.”
مريم استغربت.
“ليه؟”
رفع عينه ليها وقال بصوت منخفض:
“علشان اللي هقولهولك دلوقتي، لو حد سمعه، مش هتخرجي من القصر ده أبدًا.”
مريم حست بقشعريرة في جسمها.
“إنت بتخوفني ليه؟”
ياسين مد إيده ناحية درج الكومودينو، وطلع ظرف بني قديم.
رماه على السرير وقال:
“افتحيه.”
مريم قربت بخطوات مترددة، وفتحت الظرف.
لكن أول ما شافت الورقة اللي جواه، وشها اتغير تمامًا.
كان عقد جوازها.
لكن اللي صدمها مش العقد…
كان فيه ورقة تانية مكتوب فيها بخط واضح:
في حالة وفاة ياسين الجبالي، تنتقل ملكية جميع ممتلكاته إلى زوجته مريم، بشرط إثبات أن الزواج تم برضى الطرفين، واستمراره لمدة ستة أشهر على الأقل.
مريم رفعت عينيها لياسين بصدمة.
“إيه ده؟!”
ياسين ابتسم ابتسامة مفيهاش أي فرحة.
“دلوقتي فهمتي ليه كل العيلة كانت مستعجلة على جوازي منك؟”
مريم رجعت تبص للورقة.
“بس إنت قلت إنك اللي طلبت الجواز!”
رد وهو بيبصلها بثبات:
“وده كان أول كدبة.”
ثم أضاف بصوت أخفض:
“والأخطر إن فيه حد في عيلتي مستني موتي… ومش هيستنى الست شهور يخلصوا.”
مريم حسّت إن رجليها مش شايلينها.
“مين؟”
ياسين قرب منها بعينيه وقال:
“أخويا.”
مريم فضلت باصة لياسين، وهي حاسة إن دماغها هتنفجر من كتر الأسئلة.
“أخوك؟!”
ياسين هز راسه بهدوء.
“أيوه… أخويا فؤاد.”
“طب إيه علاقته بموتك؟ وإيه اللي يخليه مستعجل عليه بالشكل ده؟”
ياسين رجع بضهره للسرير، ووشه بان عليه التعب.
“فؤاد طول عمره شايف إن كل حاجة في الدنيا من حقه. الفلوس، الأراضي، الشركات، وحتى القصر ده. من وإحنا صغيرين وهو مقتنع إنه الأحق بكل حاجة.”
مريم قعدت على الكرسي اللي قصاده.
“بس إنت أخوه، يعني مهما كان بينكم خلاف مش معقول يوصل إنه يتمنى موتك!”
ضحك ياسين بسخرية.
“إنتِ لسه متعرفيش عيلتي يا مريم.”
“طب وإنت عرفت منين إنه عايز يقتلك؟”
سكت ياسين شوية، وبعدين مد إيده ناحية الكومودينو وفتح درج صغير.
طلع منه صورة قديمة، وحطها قدامها.
مريم مسكت الصورة.
كان فيها ياسين واقف جنب راجل أصغر منه بشوية، والاتنين لابسين بدل رسمية وبيبتسموا للكاميرا.
“ده فؤاد؟”
“أيوه.”
“طب إيه اللي حصل بينكم؟”
ياسين بص للصورة بنظرة مليانة مرارة.
“من ست شهور، اكتشفت إنه كان بيسحب فلوس من حسابات الشركة من غير علمي. ولما واجهته، طلب مني أتنازل له عن نصيب كبير من الميراث.”
“وإنت وافقت؟”
“طبعًا لأ.”
“وبعدين؟”
“بعدها بيومين، عربيتي اتقلبت على الطريق الصحراوي.”
مريم حطت إيدها على بقها.
“يا نهار أبيض!”
كمل ياسين بصوت هادي لكنه مليان غضب:
“السواق مات في الحادثة، وأنا فضلت في العناية المركزة أسابيع. الدكاترة قالوا إني ممكن ما أمشيش تاني.”
“وفؤاد؟”
“جه المستشفى كل يوم تقريبًا، وكان عامل نفسه الأخ المكسور على فراق أخوه.”
مريم بصت له بعدم تصديق.
“يعني هو اللي حاول يقتلك؟”
ياسين هز كتفه بتعب.
“معنديش دليل لحد دلوقتي، بس عندي شكوك كتير.”
“طب ليه رجعت القصر؟ ما تفضل في المستشفى لحد ما تتعافى؟”
ياسين بص لها نظرة غريبة.
“لأن المستشفى نفسها مبقتش آمنة.”
مريم حسّت بالخوف يتسلل لجسمها.
“يعني إيه؟”
“يعني حد حاول يدخل أوضتي بالليل، والممرضة اللي كانت مسؤولة عن حالتي اختفت بعدها بيوم.”
مريم قامت من مكانها.
“أنا مش فاهمة إنت عايز مني إيه بالظبط؟”
ياسين فضل ساكت شوية، وبعدها قال:
“عايزك تسمعي كويس. الجوازة دي مش مجرد عقد فلوس زي ما إنتِ فاكرة.”
مريم ردت بعصبية:
“أمال إيه؟ أنا جيت هنا علشان الفلوس، وده مش سر. إنتوا اللي عرضتوا عليا الجواز مقابل مبلغ كبير، وأنا وافقت علشان كنت محتاجة الفلوس.”
ياسين بص لها باهتمام.
“محتاجة الفلوس ليه؟”
مريم اترددت.
“مش من حقك تعرف.”
“أنا جوزك.”
ضحكت بمرارة.
“جوزي على الورق بس، وإنت أول واحد عارف إن الجوازة دي صفقة.”
ياسين فضل باصص لها، وبعد لحظة قال:
“عندك حق.”
سكت شوية، وبعدين أضاف:
“بس من اللحظة دي، أي حاجة هتحصل ليكي في القصر ده هتكون مسؤوليتي.”
مريم عقدت حواجبها.
“أنا مش محتاجة حمايتك.”
“هتحتاجيها غصب عنك.”
قبل ما ترد، سمعوا صوت خبط على الباب.
ثلاث خبطات متتالية.
ياسين اتغيرت ملامحه فورًا.
بص ناحية الباب، وبعدها همس:
“متتكلميش.”
مريم قربت منه بخوف.
الصوت جه من بره:
“يا ياسين بيه… افتح، أنا فؤاد.”
مريم بصت لياسين بسرعة.
ده أخوه اللي لسه بيتكلموا عنه!
ياسين رفع صباعه قدام شفايفه، وفضل ساكت.
فؤاد خبط تاني.
“ياسين! أنا عارف إنك صاحي، شفت النور من تحت الباب.”
ياسين أشار لمريم إنها تفتح، لكنها هزت راسها برفض.
همست:
“إنت عايزني أفتح له؟”
رد بنفس الهمس:
“اعملي اللي بقولك عليه.”
مريم قربت من الباب وفتحته سنة بسيطة.
ظهر راجل في أواخر التلاتينات، طويل وعريض الكتفين، لابس بيجامة حرير غالية، وساعة دهب في إيده.
كان شكله أنيق، وابتسامته هادية، لكن عينيه كان فيها حاجة خلت مريم تتوتر.
بصلها من فوق لتحت.
“مساء الخير… إنتِ أكيد مريم.”
مريم ردت بحذر:
“أيوه.”
ابتسم وقال:
“أخيرًا شوفت مرات أخويا. ألف مبروك يا عروسة.”
“الله يبارك فيك.”
بص من فوق كتفها ناحية ياسين.
“إيه يا ياسين؟ مش هتسمحلي أدخل أسلم عليك؟”
ياسين رد ببرود:
“داخل بيتي تستأذن ليه؟”
فؤاد ضحك.
“والله وحشتني يا أخويا.”
دخل الأوضة من غير ما يستنى رد.
قرب من السرير وبص لياسين.
“إيه ده؟! إنت بقيت أحسن؟ أنا كنت فاكر إنك لسه مش قادر تتحرك.”
ياسين رد بنبرة ساخرة:
“واضح إنك متابع أخباري كويس.”
فؤاد ابتسم.
“طبعًا، ده إنت أخويا الوحيد.”
وبعدين التفت لمريم.
“إيه رأيك في القصر؟ ارتحتي هنا؟”
مريم ردت:
“الحمد لله.”
فؤاد قرب منها خطوة وقال:
“لو احتجتي أي حاجة، اعتبريني أخوكي. ياسين طبعه صعب شوية، بس قلبه طيب.”
ياسين ضحك ضحكة قصيرة.
“خلصت؟”
فؤاد تجاهله وكمل كلامه:
“على فكرة، بكرة عندنا غدا عائلي. عايزك تنزلي معانا يا مريم، كل العيلة نفسها تتعرف عليكي.”
مريم بصت لياسين تستنى رده.
لكنه كان مركز مع أخوه.
فؤاد قرب من ياسين وهمس:
“بس نصيحة يا أخويا… خليك في سريرك، صحتك مش مستحملة المفاجآت.”
ياسين رفع عينه له.
“وأنت خليك في حالك، صحتك إنت كمان مش مضمونة.”
الابتسامة اختفت من على وش فؤاد للحظة، لكنه رجع ابتسم بسرعة.
“تصبح على خير.”
وقبل ما يخرج، وقف عند الباب وبص لمريم.
“أشوفك بكرة يا مرات أخويا.”
خرج وقفل الباب وراه.
مريم فضلت واقفة مكانها لحد ما سمعت خطواته بتبعد.
وبعدين التفتت لياسين.
“إنت شفت عينه؟”
ياسين رفع حاجبه.
“مالها؟”
“الراجل ده مش طبيعي. كان بيبصلك بطريقة تخوف.”
ياسين ابتسم لأول مرة ابتسامة حقيقية، رغم التعب اللي على وشه.
“واضح إنك بتتعلمي بسرعة.”
مريم قربت منه وقالت:
“أنا عايزة أفهم حاجة واحدة… هو إنت فعلًا متأكد إنه عايز يقتلك؟”
ياسين مد إيده ناحية الكومودينو، وطلع تليفونه القديم.
فتح تسجيل صوتي وضغط تشغيل.
في الأول كان فيه تشويش، وبعدها ظهر صوت فؤاد بوضوح:
“أول ما ياسين يموت، كل حاجة هتبقى بتاعتي. البنت دي مجرد ورقة في اللعبة، ومش هتعيش بعد ما تاخد الفلوس.”
مريم رجعت خطوة لورا، وحست إن الدم اتسحب من وشها.
بصت لياسين وهي بتترعش.
“هو… هو قال إنه هيقتلني أنا كمان!”
ياسين قفل التسجيل وبصلها بجدية.
“علشان كده من اللحظة دي، ممنوع تخرجي من القصر لوحدك.”
مريم هزت راسها بعصبية.
“لأ، استنى! أنا مش داخلة حرب بينك وبين أخوك. أنا وافقت على الجواز مقابل الفلوس، مش مقابل حياتي!”
ياسين سكت لحظة، وبعدين قال بهدوء:
“أنا عارف.”
“يبقى طلقني وخليني أمشي!”
ياسين بص لها طويلًا، وبعدها قال جملة خلتها تتجمد مكانها:
“لو خرجتي من الباب ده يا مريم، فؤاد مش هيحتاج يستنى موتي علشان يقتلك.”
وساعتها، وقبل ما مريم تقدر ترد، موبايل ياسين رن.
بص للشاشة، واتغير لون وشه.
كان اتصال من رقم مجهول.
فتح المكالمة، وسمع ثواني من غير ما يتكلم.
وبعدين الصوت اللي جاله من الطرف التاني قال:
“مبروك يا ياسين… مراتك الجديدة شكلها مش هتكمل معاك كتير. إحنا بدأنا بالفعل.”
ياسين قبض إيده على الموبايل لدرجة إن مفاصله ابيضت.
“إنت مين؟”
لكن الخط اتقفل.
رفع عينه لمريم وقال:
“اقفلي الباب كويس… إحنا مش لوحدنا في القصر.”
مريم فضلت واقفة قدام ياسين، مش قادرة تستوعب إن حياتها اتقلبت بالشكل ده في أقل من أسبوع.
كانت داخلة القصر وهي فاكرة إنها هتتجوز راجل بيموت، وهتستنى شوية وتخرج منه غنية، لكن دلوقتي اكتشفت إنها دخلت وسط عيلة مليانة أسرار وخيانة ودم.
ياسين كان ماسك الموبايل وبيحاول يتصل بحد.
“أيوه يا حسن… عايزك تقفل كل بوابات القصر، ومحدش يدخل ولا يخرج من غير إذني. وخلي رجالتك يراقبوا كل أوضة وكل ممر.”
منذ 4 أيام
0 213 14 دقائق




