
في لحظتها، رن تليفون المكتب جنبنا. سمر ردت: «أيوه يا فندم.. حاضر.» بصتلي وقالت: «مريم.. يوسف بيه طالبك في مكتب الإدارة فوق.»
ركبي خبطت في بعضها تاني. أخدت نفس، وعدلت الشاطة بتاعتي وطلعت الدور الأخير.. دور الإدارة اللي طول عمرنا بنعدي من قدامه بنمشي على أطراف صوابعنا.
خبطت على باب المكتب الخشب الثقيل.
«ادخل.»
فتحت الباب. المكتب كان واخد الدور كله، واجهات زجاجية مطلة على القاهرة كلها من فوق. يوسف كان قاعد ورا مكتب أبنوس ضخم، قدامه ملفات وقهوة مضبوطة. كان لابس قميص أبيض ومتشمر لحد كوعيه، وساعته الماركة بتلمع تحت الشمس.
أول ما شافني، حط القلم من إيده وشاورلي أقعد: «صباح الخير يا مريم. اتفضلي.»
قعدت على طرف الكرسي: «صباح النور يا يوسف بيه.. أنا.. أنا جيت أشكر حضرتك على اللي عملته امبارح، وعلى الترقية وموضوع الجراج، بس بصراحة.. أنا مش فاهمة ليه كل ده؟»
يوسف سند ظهره على الكرسي، وبصلي بتركيز نفس النظرة الرمادية الحادة بس المرة دي كان فيها دفا غريب:
«أولاً يا مريم.. الترقية دي مش مجاملة. ملفك التقيمي في المستشفى بقاله سنة ممتاز، وأنتِ أكتر واحدة بتشيلي الشفتات الصعبة ومحترمة في شغلك.»
سكت ثانية، وبعدين كمل بصوت واطي هادي:
«ثانياً.. سيد ده مش أول مرة يضايقك. بقاله شهرين بيلف حوالين المستشفى، وأنا المرة دي ما تد خلتش بالصدفة.»
عيني وسعت بالذهول: «حضرتك كنت عارف؟!»
يوسف ابتسم ابتسامة خفيفة أظهرت تجاعيد هادية جنب عينيه:
«أنا اللي بتابع كاميرات المستشفى دي من مكتبي بالليل لما بسهر لل شغل.. شفتك كذا مرة وأنتِ طالعة تعبانة ومقتولة من الشغل، وشفت نظرات الخوف اللي في عينيكي لما تلفوني ترني برقم غريب.. ولما شفته واقف جنب عربيتك امبارح من البلكونة، نزلت عشان أحط حد للمهزلة دي.»
بلعت ريقي وأنا مش مصدقة إن فيه حد كان شايف معاناتي اللي محدش حاسس بيها طول الشهرين اللي فاتوا.
يوسف وقف، ومشي لحد الشباك الكبير وهو حاطط إيده في جيبه:
«سيد أتمسك امبارح، وتحرز التليفون بتاعه، والنيابة أدت أمر بـ حبسه ١٥ يوم على ذمة التحقيق بتهمة التحرش والتتبع والتهديد.. والقصة دي انتهت للأبد، مش هيدخل حياتك تاني.»
التفت لي وبص في عيني بوضوح:
«من النهاردة.. أنتِ في أمان يا مريم. وفي مستشفياتي.. محدش بيمس حد من أفرادي.»
الدموع جمعت في عيني، بس المرة دي مش دموع خوف.. كانت دموع راحة، راحة بقالي سنتين ما حسيتهاش.
رديت بصوت مرتعش: «شكراً يا يوسف بيه.. بجد مش عارفة أرد أفضالك دي إزاي.»
يوسف حرك رأسه بالراحة وقال بنبرة فيها عشم خفي:
«رديها بأنك ترجعي تبتسمي وتشتغلي من غير ما تبصي وراكي.. ويا سيدي، لو مصممة تردي الجميل، القهوة بتاعة الدور الرابع عندكم بيقولوا إنها أحسن قهوة في المستشفى.. أبقى اعمليلي كوباية لما أنزل أفتش عليكي.»
طلعت من مكتب يوسف العطار وأنا حاسة إن الهواء يدخل صدري لأول مرة من سنتين. الخوف اللي كان حابسني مات تحت جراج المستشفى.. والراجل اللي كان يراقب كل حاجة في الصمت، فتحلي باب لحياة جديدة تماماً.




