يا جماعة الخير، الكوليرا بدأت تنتشر في مناطق كسلا والقضارف، والوضع خطـ,,ـير جدًا. الكوليرا دي ما لعبة، انتشارها سهل شديد أكتر مما تتخيلوا، ودايرين نحذركم عشان تحافظوا على سلامتكم وسلامة أهلكم.
أول حاجة، وقفوا أكل المطاعم تمامًا خلال الفترة دي. المطاعم ممكن تكون مصدر مباشر للعدوى، خصوصًا إذا كان ما في اهتمام كبير بالنظافة. الأكل اللي جاي من برة مشكوك في نظافته، وما مضمون أبداً. فأفضل حاجة إنكم تأكلوا في البيت وتأكدوا من نظافة الأكل تمامًا قبل ما تاكلوا.
ثانيًا، أي موية تشربوها لازم تكون موية صحية، مغلية أو معالجة بالكلور. الموية غير النضيفة أكبر وسيلة لنقل العد,,وى. أي موية من مصادر غير مضمونة ما تشربوها. خليكم دايمًا على الحذر وشربوا موية مأمونة فقط.
والأكل لازم يكون مطبوخ كويس، ما تأكلوا أي حاجة ما طالعة من النار مباشرة، لأن النار بتقتل البكتيريا. وما تدخل يدك في الأكل مباشرة، استخدم أدوات غرف مخصصة حتى لو كنت في بيتكم. الحلة، حتى لو كانت حلة عدس، ممكن تكون مصدر للعدوى لو ما اتبعت إجراءات النظافة المطلوبة.
ثالثًا، نظافة اليدين ضرورية جدًا. دخلت الحمام، أول حاجة تعملها بعد الخروج إنك تغسل يديك بالصابون كويس. قبل الأكل، بعد ما تسلم على أي زول، أو حتى لو ما عندك موضوع ومجرد زهجان، اغسل يدك. عدم الاهتمام بالنظافة ممكن يكون سبب في الإصـ,ـابة بالكوليرا.
يدك ما تمشي على وجهك، خصوصًا خشمك وعينك. الفيروس ممكن يدخل جسمك عبر الأغشية المخاطية، ولو جاتك الكوليرا، ممكن تموت خلال ساعات لو ما لقيت رعاية طبية سريعة. الناس بتفتكر إنو شوية إسهال ما مشكلة كبيرة، لكن مع الكوليرا، الوضع بيكون مختلف تمامًا. الجفاف الشديد، الإسهال، الاستفراغ، الهبوط في الضغط، وضربات القلب ممكن تحصل بدون مقدمات، وخلال ساعات قليلة ممكن تكون في وضع حرج جدًا.
لو حسيت بأي أعراض مشابهة للكوليرا أو أي إسهالات حادة، أول حاجة تعملها إنك تشرب سوائل كتيرة عشان تعوض الجفاف. امشي الصيدلية فورًا وجيب محلول ORS، حلوه في مو,وية نضيفة واشرب لحدي ما تلقى مكان تتعالج فيه. المحلول دا بيساعد في تعويض السوائل والأملاح اللي بيفقدها جسمك.
وأخيرًا، تذكر دايمًا إن الوقاية خير من العلاج. المستشفيات في ظروف زي دي ممكن تكون مكتظة وما تلقي العلاج المناسب بسهولة، لذلك الحذ,,ر واجب، واتباع إجراءات الوقاية ممكن يفرق بين الحياة والموت. خليك حذر، وخليك واعي، والله يحفظكم جميعًا.